From Classroom to Impact: Addressing Societal Challenges with Citizen Science

 

“From Classroom to Impact: Addressing Societal Challenges with Citizen Science”

“Од училницата до вистински промени: Решавање на општествените предизвици  преку граѓанската наука”

Курсот е посветен на современиот пристап во образованието познат како Citizen Science (Граѓанска наука), кој им овозможува на учениците активно да учествуваат во научни истражувања и да придонесуваат кон решавање реални општествени и еколошки предизвици. Основната идеја е научното образование да не се ограничува само на теоретско учење и експерименти во училницата, туку учениците да станат активни истражувачи чии набљудувања, мерења и собрани податоци можат да придонесат за вистински научни истражувања.

Преку курсот наставниците се запознаваат со принципите на граѓанската наука, примери на успешни меѓународни истражувачки проекти и можностите за нивно вклучување во наставата. Посебно внимание се посветува на петте главни мисии на Европската Унија, поврзани со климатските промени, здравјето, заштитата на океаните и морињата, развојот на климатски неутрални и паметни градови и здравјето на почвата.

Курсот нуди практични насоки за избор и примена на соодветни проекти во училишната средина, планирање истражувачки активности, собирање и анализа на податоци, како и процена на постигнатите резултати. Наставниците учат како да креираат сопствени сценарија за учење во кои учениците преку истражување на непосредната околина ќе развиваат научна љубопитност, критичко размислување, тимска работа и чувство на општествена одговорност.

Посебната вредност на курсот е во поврзувањето на училиштето со научната заедница и реалните потреби на општеството. Тој поттикнува интердисциплинарен пристап, активно учење и соработка меѓу учениците, наставниците, научниците и локалната заедница.

Овој курс е одлична можност за наставниците да внесат нова димензија во наставата - учениците да не бидат само приматели на знаења, туку активни учесници во создавањето нови научни сознанија и решавањето на проблемите во нивната средина. На тој начин, учењето добива вистинска смисла, а училницата станува место од кое започнуваат позитивни промени во општеството.

Курсот е реализиран во рамките на европскиот проект CROPS, во соработка со Scientix, а е наменет првенствено за наставници од основното и средното образование, како и за други образовни работници.

Повеќе информации: European Schoolnet Academy - Citizen Science MOOC

Cyberbullying in a Rapidly Changing Digital World

 

Cyberbullying in a Rapidly Changing Digital World

“Сајбер-насилството во светот на дигиталните промени”

 

Курсот “Cyberbullying in a Rapidly Changing Digital World” е насочен кон подигање на свеста, стекнување знаења и развивање практични вештини за препознавање, спречување и соодветно реагирање на сајбер-насилството во современото дигитално опкружување. Преку актуелни теми, примери од секојдневниот живот и интерактивни активности, учесниците се запознаваат со различните форми на онлајн насилство, неговите причини, последици и влијанието врз емоционалната благосостојба, самодовербата и социјалните односи на децата и младите.

Посебно внимание се посветува на препознавањето на улогите на жртвата, сторителот и набљудувачите, како и на одговорноста на секој поединец во спречувањето на штетното однесување на интернет. Курсот ги обработува и современите предизвици поврзани со социјалните мрежи, дигиталната комуникација, злоупотребата на лични фотографии и податоци, како и новите ризици што ги носи развојот на вештачката интелигенција.

Преку практични примери, дискусии, сценарија и активности, наставниците и едукаторите развиваат стратегии за навремено препознавање и пријавување на сајбер-насилството, обезбедување поддршка на жртвите и создавање безбедна и инклузивна дигитална средина. Особено се нагласува важноста на соработката меѓу училиштето, родителите и пошироката заедница, како и развивањето емпатија, меѓусебно почитување и одговорно дигитално однесување.

Курсот нуди корисни знаења и применливи алатки кои им помагаат на наставниците да ги оспособат учениците критички и одговорно да го користат интернетот, да препознаваат ризици, да побараат помош кога е потребно и активно да придонесуваат кон градење позитивна дигитална култура. Неговата посебна вредност е во тоа што ги поттикнува наставниците да не бидат само набљудувачи, туку активни носители на промените во создавањето безбедна, поддржувачка и почитувачка училишна и дигитална заедница.